काठमाडौं, ६ फाल्गुन – भारतको ओडिसास्थित कालिङ इन्स्टिच्युट अफ इन्डस्ट्रियल टेक्नोलोजी (केआईआईटी)मा अध्ययनरत नेपाली विद्यार्थी प्रकृति लम्सालका बुबा सुनिल लम्सालले ‘ब्ल्याकमेल’ गरेर छोरीलाई आत्महत्या गर्न बाध्य पारिएको प्रतिक्रिया दिएका छन् । भारतीय सञ्चारमाध्यमलाई प्रतिक्रिया दिँदै बावु सुनिलले यस्तो बताएका हुन् ।
‘हामीलाई थाहा छ अनुसन्धान चलिरहेको छ। पोस्टमार्टम प्रतिवेदन आउन बाँकी छ,’ उनले भने, ‘तर हामीलाई थाहा छ यसलाई भावनात्मक ब्ल्याकमेल गरेर आत्महत्या गर्न बाध्य पारिएको हो ।’
लम्सालले युनिभर्सिटी प्रशासनसँगको छलफलको सन्दर्भमा थप भने, ‘हिजो युनिभर्सिटी प्रशासनमा छलफल भयो केही निष्कर्ष भने निस्किएन। तर प्रहरी र क्याम्पस प्रशासनले सहयोग गरिरहेका छन् ।’
उनले आफ्ना छोरा पनि यहीँ पढ्ने र उसले नै घटनाबारे प्रहरी र प्रशासनलाई जानकारी गराएको बताए । एक जनालाई पक्राउ गरिएको र त्यो व्यक्ति नै घटनाको मूल कारण भएको उनको आरोप छ । ‘छोरीको फोन, ल्यापटप र डायरी फरेन्सिक विभागलाई बुझाइसकिएको छ,’ उनले भने, ‘प्रहरी र स्थानीय सरकारले सहयोग गरिरहेका छन् ।’
तर उनले युनिभर्सिटीले विद्यार्थीहरूलाई क्याम्पस छोड्न भनिएको विषयमा आपत्ति जनाए । ‘विद्यार्थीलाई क्याम्पस छोड्न भनिनु उचित होइन । हामीलाई न्याय चाहिएको छ,’ उनले भने ।