काठमाडौं, २४ चैत्र – नेकपा एमालेका महासचिव शंकर पोखरेलले राप्रपाका कार्यकर्ताले जननिर्वाचित प्रधानमन्त्री बीपी कोइरालाको शालिकमा कालोमोसो दलेको घटनाप्रति आपत्ति जनाएका छन् ।
सामाजिक सञ्जाल फेसबुक मार्फत उनले राप्रपा राजतन्त्र होइन, राजसंस्था पुनस्थापनाको आन्दोलनमा हो भन्नेहरुले नेपालगञ्जमा बीपीको सालिकमा कालोमोसो दल्ने र तोडफोड गर्ने धृष्टता गरेको उल्लेख गरेका छन् ।
पोखरेलले कांग्रेसभित्रका संवैधानिक राजसंस्था पक्षमा रहनेहरुलाई इङ्गित गर्दै पूर्वराजा ज्ञानेन्द्रको शासन बेहोर्नु परेको भए बीपी पनि गणतन्त्रका पक्षमा उभिन्थे भन्ने तर्क गरे ।
उनले बीपीको समयमा बीपीभन्दा बढी नै संवैधानिक राजसंस्थाका हिमायती रहेका गिरिजाप्रसाद पनि ज्ञानेन्द्रको हर्कतले गणतन्त्रवादी बन्न पुगेको बताए । नेपालमा लोकतन्त्र र राजसंस्था सँगै जान सक्छ भन्नेहरुले राप्रपाको गतिविधि बुझ्नु पर्ने बताए ।