काठमाडौं, – जाजरकोटको नलगाड नगरपालिकाबाट रुकुम पश्चिमतर्फ आउँदै गरेको एक टिपर मङ्गलबार राति भेरी नदीमा खस्दा चालकसहित तीन जना बेपत्ता भएका छन् । भेरी करिडोर निर्माण कार्यमा संलग्न यती बिल्डर्सको रा१क १५०१ नम्बरको टिपर रुकुम पश्चिमको आठबीसकोट नगरपालिका-१४, पिपलचौरस्थित सडकबाट नदीमा खसेको हो ।
इलाका प्रहरी कार्यालय रिम्नाका प्रहरी नायब निरीक्षक शिवकुमार चौधरीका अनुसार, दुर्घटनामा परेकाहरूमा टिपर चालक दाङ निवासी ३५ वर्षीय मनिराम चौधरी, रुकुम पश्चिमको सानीभेरी गाउँपालिका-३ का धनवीर बराइली र अर्का एक जना पहिचान नखुलेका व्यक्ति रहेका छन् । पहिचान नखुलेका व्यक्ति एक्स्काभेटरका सहचालक रहेको बताइएको छ । उनीहरू आठबीसकोट-११, चिसापानीस्थित कार्यस्थलबाट आठबीसकोट-१४, छेपारेतर्फ फर्कंदै गर्दा दुर्घटनामा परेका हुन् ।
गएराति करिब ८ बजेतिर भएको उक्त दुर्घटनापछि तत्कालै खोजी कार्य सुरु गरिएको थियो । बेपत्ताहरूको खोजीका लागि रुकुम पश्चिम र जाजरकोटबाट प्रहरी टोली परिचालन गरिएको छ । यद्यपि, भेरी नदीमा पानीको बहाव अत्यधिक बढेकाले खोजी तथा उद्धार कार्यमा गम्भीर चुनौती थपिएको प्रहरी नायब निरीक्षक चौधरीले बताए । उनले भने, ‘नदीको उर्लंदो भेल र धमिलो पानीका कारण टिपर र बेपत्ता व्यक्तिहरूको अवस्था पत्ता लगाउन निकै कठिन भइरहेको छ ।’
दुर्घटनाग्रस्त टिपर नदीमा डुबेको अवस्थामा रहेको र हालसम्म फेला पर्न सकेको छैन । बेपत्ता भएकाहरूको अवस्था पनि अज्ञात रहेको छ । प्रहरीले घटनाको थप अनुसन्धान गरिरहेको जनाएको छ ।