काठमाडौं, २० असोज – नेपाली बजारमा सुनको मूल्यले सोमबार नयाँ ऐतिहासिक रेकर्ड कायम गरेको छ । नेपाल सुनचाँदी व्यवसायी महासंघका अनुसार छापावाल सुनको मूल्य प्रति तोला २ लाख ३३ हजार १०० रुपैयाँ पुगेको छ, जुन अहिलेसम्मकै उच्च हो ।
दशैंपछि सुनको भाउ तोलामा करिब १० हजार रुपैयाँ बढेको छ । नेपाली बजारमा दशैंका कारण केही दिन मूल्य समायोजन गरिएको थिएन ।
दशैंपछि एकैपटक समायोजन हुँदा मूल्यमा उच्च वृद्धि देखिएको नेपाल सुनचाँदी व्यवसायी महासंघले जनाएको छ । दशैंअघि असोज १२ गते सुनको भाउ प्रतितोला २ लाख २३ हजार २ सय रुपैयाँ रहेकोमा अहिले ९ हजार ९ सय रुपैयाँ बढेर आज सोमबार २ लाख ३३ हजार १ सय रुपैयाँ पुगेको छ ।
आइतबार २ लाख ३० हजार ६०० रुपैयाँमा कारोबार भएको सुनको मूल्य सोमबार थप २ हजार ५०० रुपैयाँले बढेको हो । यससँगै विवाह तथा अन्य शुभकार्यका लागि सुन खरिद गर्ने योजना बनाएकाहरूलाई यो मूल्यवृद्धिले ठूलो धक्का दिएको छ ।
सुनको मूल्यवृद्धिसँगै चाँदीको मूल्यमा पनि तीव्र वृद्धि देखिएको छ । आइतबार प्रति तोला २ हजार ९३० रुपैयाँमा कारोबार भएको चाँदी सोमबार प्रति तोला २ हजार ९६० रुपैयाँ पुगेको छ ।