सरकारको नेतृत्व गरिरहेको नेकपा एमाले काठमाडौंमा शक्ति प्रदर्शन गर्दै

by cityhalkhabar
2 views

काठमाडौं, ७ मंसिर  – सरकारको नेतृत्व गरिरहेको नेपाल कम्युनिस्ट पार्टी (एमाले)ले आज (शुक्रबार) काठमाडौंमा सडकमा शक्ति प्रदर्शन गर्न लागेको छ । एमालेको काठमाडौं, ललितपुर र भक्तपुर जिल्ला कमिटीको संयुक्त आयोजनामा शुक्रबार काठमाडौंको दरबारमार्गमा शक्ति प्रदर्शन गर्न लागेको हो।

शक्ति प्रदर्शन गर्न यसअघि भृकुटीमण्डपमा गर्ने भनिएपनि बुधबार स्थान परिवर्तन गरी दरबारमार्गमा गर्ने निर्णय भएको थियो। शक्ति प्रदर्शन गर्न अघि विभिन्न ठाउँबाट निकालिएको र्‍याली दरबारमार्ग पुग्ने कार्यक्रम छ। भद्रकालीबाट सुरू हुने र्‍याली सुन्धारा, वीर अस्पताल, रत्नपार्क घन्टाघर हुँदै दरबारमार्गमा पुगेर सभामा परिणत हुने बताइएको छ।

मुलुकमा बढ्दो अराजकता, अस्थिरताविरुद्ध लोकतन्त्र, शान्ति, राष्ट्रिय एकता, सामाजिक सद्भाव, सुशासन, समृद्धि र विकासका लागि विधिको शासन र कानुनी राजका पक्षमा जनमत निर्माण गर्ने उद्देश्यका साथ सभा गर्न लागेको एमालेले जनाएको छ। सभाले पार्टीको दृष्टिकोण, धारणा, आमजनताका बीचमा पुऱ्याउने उद्देश्य लिएको एमालेको दाबी छ।

आजै मेडिकल व्यवसायी दुर्गा प्रसाइँ समूहको प्रदर्शन पनि छ। सो समूहलाई कोटेश्वरमा प्रदर्शन गर्न प्रशासनले अनुमति दिएको छ।माइतीघरमा सहकारी पीडितहरूको प्रदर्शन जारी नै रहने बताइएको छ।

यसले दिउँसो काठमाडौंमा यातायात प्रभावित हुनेछ। ट्राफिक व्यवस्थापन र सुरक्षा व्यवस्था सोहीअनुसार गरिएको प्रहरीले जनाएको छ।