सुर्खेत, २५ फागुन – नेपाल सरकारका गृहमन्त्री रमेश लेखकले गणतन्त्रको विकल्प राजतन्त्र नभएको भन्दै दोहोर्याएका छन्। आज सुर्खेत पुगेर पत्रकारहरूसँग कुरा गर्दै मन्त्री लेखकले राजतन्त्र आउँछ भन्ने भ्रमबाट नहौसिन पूर्वराज ज्ञानेन्द्र शाहलाई चेतावनी समेत दिएका हुन्।
‘केही मानिसहरूले गणतन्त्रको विकल्प राजतन्त्र हुन्छ भनेर भ्रम फैलाइरहेका छन् । त्यो भ्रमले पूर्वराजा हौसिन आवश्यक छैन’, गृहमन्त्री लेखकले भने । जनताले आन्दोलन र क्रान्तिबाट फालिसकेको राजालाई पुनः फर्काउँछन् भन्ने भ्रम नपाल्न उनले पूर्वराजलाई आग्रह गरे ।
गृहमन्त्री लेखकले हाम्रो देशको लोकतन्त्र उदार र भएको भन्दै जनताले फालेको राजतन्त्रका राजालाई पनि सबै स्वतन्त्रता उपभोग गरेर बस्न दिइरहेको उल्लेख गरे।
यसलाई लोकतन्त्रको कमजोरीका रूपमा नलिन समेत पूर्वराजालाई उनको चेतावनी रहेको छ । ‘हाम्रो लोकतन्त्र यति संयमित, यति उदार, यति परिष्कृत छ कि जनताले फालिसकेको राजतन्त्रका राजा पनि सबै स्वतन्त्रता र अधिकारलाई उपभोग गरेर बसिराखेका छन् । यसलाई लोकतन्त्रको कमजोरीका रूपमा कसैले पनि नलियोस्’, उनले भने ।
आन्दोलन र क्रान्तिबाट फालिएका राजसंस्थाका राजाहरू उसै देशमा स्वतन्त्रतापूर्वक अधिकार उपभोग गरी बसेको इतिहास कमै भएको भन्दै नेपाली जनताले दिएको त्यो स्वतन्त्रता नबिर्सिन पूर्व राजा शाहलाई मन्त्री लेखकले सचेत गराएका हुन्।