काठमाडौं, – दोलखामा दुई मोटरसाइकल एकआपसमा ठोक्किँदा भएको दुर्घटनामा गौरीशङ्कर बहुमुखी क्याम्पसका स्ववियु सभापतिसहित दुई युवाको मृत्यु भएको छ । मंगलबार राति भीमेश्वर नगरपालिका-६, रमितेडाँडामा भएको उक्त दुर्घटनामा परी अर्का एक व्यक्ति घाइते भएका छन् ।
जिल्ला प्रहरी कार्यालय, दोलखाका अनुसार दुर्घटनामा क्याम्पसका स्ववियु सभापति, भीमेश्वर नगरपालिका-५ माटीका २४ वर्षीय शिरिष बस्नेत र मोटरसाइकलमा सवार बैतेश्वर गाउँपालिका-३ मिर्गेका २६ वर्षीय श्याम बहादुर खत्री ‘सुजन’ को मृत्यु भएको हो । राति करिब ९ बजे भएको दुर्घटनापछि उपचारका लागि चरिकोटस्थित च्छोरोल्पा अस्पताल लगिएकामा उपचारकै क्रममा दुवैको मृत्यु भएको प्रहरीले जनाएको छ ।
काठमाडौँबाट चरिकोटतर्फ जाँदै गरेको बस्नेतले चलाएको बा.५३ प ८८९९ नम्बरको मोटरसाइकल र विपरित दिशाबाट आउँदै गरेको बा.प्र.०२-०३४ प ३२४२ नम्बरको मोटरसाइकल लामोसाँघु-जिरी सडक खण्डमा एकआपसमा ठोक्किएका थिए । दोस्रो मोटरसाइकलका चालक बैतेश्वर गाउँपालिका-५ का २५ वर्षीय निर्मल खड्का सामान्य घाइते भएका छन् ।
उनलाई प्रहरीले नियन्त्रणमा लिएर घटनाबारे थप अनुसन्धान अगाडि बढाएको छ । एक उदीयमान विद्यार्थी नेताको असामयिक निधनले दोलखाको शैक्षिक तथा युवा वृत्तमा शोक छाएको छ ।